ياقصيدي نخيتك من قساوي شقاي

والله اني كتبتك بالنهار الكبير

يوم وقفت وصارت غيمة في سماي

كل ماقلت راحت عودت تستدير

وان تلفتت حولي طالب الناس راي

كل اقفى وخلاني بحال خطير

بس من قو باسي ماعرفوا وش مداي

ما انثنت لي عزايم لو يطول المسير

تارك كل شغل وكل هم وراي

كلها ماتساوي وزن حبة شعير

ودي اشوف واعرف عن نهاية هواي

كان غاية وصار اليوم عندي مصير

كل ما اطقها تخطي وانا وش بلاي

تعترضها عوارض مثل حوس المرير

لوظروف الليالي يوم توقف معاي

كان يمدي حبالي وردت كل بير

انظر الناس فوق وناسي في مستواي

بس انا غير واللي شفتهم ناس غير

صبري اللي مقويني وبالله رجاي

قال لي واصل المشوار لاتستخير

قلت شكواي لله وابشري ياخطاي

بدلي شوك والرمضاء بلمس الحرير

والهدف من بشوفه زال محرق ظماي

كل لامع سراب يصير عندي غدير

وان وصلته حرام يقول من وين جاي

وكان هذا سواله غايته يستثير

غصن زيتون حطيته لعينك عصاي

مسألة حب ماتحتاج سيف شطير