دار تمر اقدام خلي ترابها
جعل الحيا بالسيل يسقي جنابها
وتنبت خزاماها وينبت بها النفل
الديرة اللي نور عيني ربى بها
والله احب الدار من حب صاحبي
احبها واحب من هو مشى بها
احب واديها وشاسع سهولها
واحب قريتها وشامخ هضابها
ياليت لو تدري وتعلم بحالتي
وماصاب حالي من عنا الود صابها
وياليت لو تدري وتسمح ظروفها
واشكي عليها الحال واسمع جوابها
وياليت لو تدري وتعرف مقامها
وتعرف معزتها وتنقذ مصابها
انا المتيم في هواها وحبها
وهي همها تلبس وتنقش خضابها
بين الرجا والياس عايش على الرجا
واهيم بالظماة واطرد سرابها
حبه طبع في خافي الروح بصمته
واخاف اموت وعلتي ما درى بها
