يا الله انك لا تخيب بهالدنيا رجاي

حازم كل الحقائب وعفوك نذكره

سكة مسار واحد لرايح ما هو جاي

انت عارف ويش يأخذ مسافر لسفره

يا كريم رضاك هو مطلبي وآخر مناي

ان بغيت اذكر ذنوبي ذكرت المغفره

حيرتي خلتني اقصر عن الهفوة خطاي

ما هو لا قلة عزيمه ولا هي مقدره

بس اشوف الغيم فوقي ولا تمطر سماي

كيف ما مرت علي المزون الممطره

وش اسوي فيك دنيا وهذا اللي جزاي

كل فعلي ضاع عيا زماني يذكره

دايم يخطى عليه ولا يسمح خطاي

والغريبه منتظرني اجي له واشكره

وقفت الاقدار ليه عقب طاحت عصاي

بعد ما صارت هزيمه وصارت مجزره

وان بغيت اجبر كسوري بلايه من دواي

كل عظم يجبره قدم جبره يكسره

حارت الفكرة براسي ولا هو من عماي

كل ما اجمعها تصير الحلول مبعثره

بس ما اتعبني وبيح مع المدة خفاي

غير زرع خايف اموت ما شفت ثمره

كل ما قلت اتناسى التعب وانسى شقاي

كيف تمحى ذكريات ونقش بحجره