كذا حالة الدنيا من أول ليوم الدين

حياة وممات وكل حي بها مفتون

من الطين جينا ثم نرجع لذاك الطين

ولاباقي الا وجه ربي ويفنا الكون

بما سن سبحانه وما قدره راضين

لو الحزن يملا كل قلب وحشا وعيون

غشى المملكة حزن طرد غفوة الغافين

ولذيذ الكرى يومه نعى الناعي ابن غصون

فقيد الوطن والعلم والمعرفه والدين

نظيف الصحايف طيب القول والمكنون

نصيحٍ فصيحٍ هرجته ماتبي تبيين

بخيصٍ حريصٍ عن طريق الزلل مصيون

الموت حق وما من الناس مخطيه

شي ذكره الله بخير الكلاما

ترى السعيد اللي ثقال حسانيه

ياخذ كتابه في يمينه وساما

شيخ رحل عنا مجيب لداعيه

الله يبيحه عد رد السلاما

انا اشهد ان الطيب لومات راعيه

يبقى كما ريح النفل والخزاما

ولامات من بالعلم عطر مماشيه

لا والذي ينشي حقوق الغماما

البارحه من ونة الشيخ ونيت

من ونته ضاقت محاجر اضلوعي

ياليت انا في ونته ما توحيت

عليه انا أسهر والخلايق اهجوعي

لولايقين القلب ياعلي عديت

رجم رفيع فوق عالي الضلوعي

وابديت به ماكان بالصدر كنيت

واسقي الرياض الممحلة من ادموعي

يامل قلب يحن ويهجل اهجالي

حنة خلوج عن الحيران منحيه

عليك ياللي بقلبي غاليٍ غالي

ياللي سكن بالنسيم وتارك حيه

عليك كل يصيح بصوته العالي

كل الدول روحت للبيت برقيه

كل يعزي وينعى ماض الافعالي

خسارةٍ ماتعوض بالسعوديه