الا يا ويش بنت لا تركها صاحبه له شأن

بوقت الخير تشفع له وتاقف بالخطا ضده

وهي وقت الطلب تعطي دلايلها بلا برهان

تدوم ولا يغيرها الزمن لو طالت المدة

عبر صفحة تراث بعيدنا ابارك من الوجدان

لقايدنا فهد يا الله عساه بعونه يمده

وابومتعب ابارك له بعيد الفطر مع سلطان

وكل الشعب ابارك له من الخفجي الى جدة

بعد ذا يالتميمي دوك حل اللغز يومه بان

واظنك تقصد البصمة تراها هانت الشده

أهنيكم بعيد الفطر عبر تراثنا يا أخوان

عسى المولى يعيده للوطن بالخير ويرده

وحل اللغز ما يصعب على اللي يفهم القيفان

تراها بصمة ابن آدم مكانه في طرف يده

اشوف الحظ يعاندني وأنا راضي ولا زعلان

على ما قيل مثل السين بين الدال والشده

صحيح ان البصمات بعملها تثبت البرهان

وكل في بصماته دريكٍ رغم ابو جده

ألا يا مرحبا بك عد ما هل المطر هتان

وعدد ما أقبل مرخ يمشي وسمنان امتلا سده

كتبت اللغز يا محمد وصغته بأحسن الأوزان

وحله عندنا البصمة وكلٍ يبصم بيده

توكلنا على المعبود يوم اللغز حله بان

إله نستعينه في سنين الخير والشده

تدين البصمة المجرم ترى لو حاول النكران

بعد شاف الحقايق والادلة كلها ضده

مثل ما للبحر هيبة,, وله بذل,, وعطا,, واحسان

ترى للشعر موروثٍ كما غيث الحيا مده

يسافر به على ضو القمر,, ويصافح الأمزان

ويزهم بصمة الإبداع تكسب بالرضا ودّه

ألا يا مرحبا بك يا التميمي يا نسل عدنان

قرينا بالجزيرة ما ضمرت وشاقني رده

تراك ان رحت للمسجد تجي من خطوتك ربحان

ولكن بصمته يا صاح لو يخطى فهي ضده

الى من الرجاء رز البيارق بالفرح طربان

يسل الياس سيفٍ تاقف القرعة على حده

لون الحظ مالت من سنامه كفة الميزان

تشابه بصمة الكرنيش فالدمام وبجدة

على طاري سواليف الغلا,ز ومسامر الريضان

سريت أشعب ذلول الشوق للي لاعني صده

تباريني عسوس اللوم,, وأزبن في ذرا الرحمن

وأقول الله على اللي بصمته بالخير ممتدة