ياناقد الناس ليتك تنقد اطباعك
ليتك تعيش الصراحة مع عذاريبك
على خطايا البشر لاتفتح اسماعك
وتغض طرفك عن اخطاك برجا طيبك
لاتجعل اعراض خلق الله هي أطماعك
وتصبح هي الحلم هي قمة مطاليبك
لو طاعك البعض بعض الخلق ما طاعك
يرفض قبول النصيحه منك ويعيبك
لاتندفع صعب باكر حيل مرجاعك
واقرب قريب يتخلى عنك ويسيبك
حاول تدارك خطاك وناقش اوضاعك
من قبل ريح العمى والعيب تدويبك
فكر بصيفك وميز لون مرباعك
ترى العواقب وخيمه لا انكشف غيبك
لاتحسبك بالكماله راجحٍ صاعك
وتناقض النفس في ساحة معازيبك
اشر النصيحة من اللي نيته باعك
بلا ثمن بس قدرها بترحيبك
والعفو كان الحقيقة لونها راعك
مانيب شامت ولكن واقعك عيبك
