ذكرتني في جولة مالها اجناس
تاريخ ماينسى ربيعه وعامه
حينا الكهف هو والمضابيع وشماس
ومنهن حدرنا للنعايم ورامه
انا وخوي خوته ترفع الراس
ياسعد من هو بالشدايد حزامه
على العلوم الغانمه يضرس اضراس
مادق به عرق الردىوالرخامه
ياقل جنسه يوم اطالع مع الناس
ابن الخطيب اللي رفيع مقامه
ناوين تال الوقت وقفه ومجلاس
في موقع غاية هواي ومرامه
وجيناه عصر الاربعاء قبل الادماس
الكل منا منتهي من دوامه
يازين شبة نارنا غرب الاطعاس
بالصيهد المنقاد من خشم رامه
قلط دلاله هيلهن يجلا العماس
بيض بغاديد عليهن علامه
وخد النفود يفوح ربله وبسباس
يشفي عبيره من عنا الوقت ضامه
البارحه ممطورواليوم نسناس
والجو غايم مدلهم ظلامه
نسمة هواه ترد للروح الانفاس
يغريك ذعذاعه تطش العمامه
هذي حلاة العمر سجات واوناس
والا العمر فاني وتاليه خامه
