ونيت مثل الصويب اللي صوابه من معاطيب
طريح فوق الظهر حتى لجنبي ما استطيعي
لكن قلبي يزوعي والتزوع من تجاريب
واللي مجرب ليامنك عذلته مايطيعي
يبا التزواع مع ربعاً كما صقر المراقيب
زاعوا على العز والناموس والساق المنيعي
زاعوا وجاني خبرهم بعد زاعوا مع مناديب
يقول زلا ضعنهم ماشي الخط السريعي
ما ردهم من يشاورهم ولاكثر التحاسيب
وحلوا بتلك الرياض اللي تغشاها الربيعي
ياليتني كان اباريهم على عز وعلى طيب
ننزل سوى وان مشينا مشينا دايم جميعي
وليا نصينا من الاجناب مانغوى المواجيب
نثبت ونرسي وننطح فاللوازم كل ريعي
منهاج من قبلنا سجوا بنا دار الاجانيب
وحنا بعدهم على الناموس نشري مانبيعي
