انشدك عن حبل طويل وممدود

مايلزمه ياكود قرم الرجاجيل

الحبل معروفٍ ولاهوب موجود

يذكر ولاينشاف باقوى الدرابيل

حبل الرجا والوصل ثابت ومشدود

وحبل الرجا بالله قوي يامشاكيل

المرجله باصحابها تطلب الزود

وانتم اهلها ياهل الجود والهيل

المرجله عسره على كل مقرود

وماطالها نقالة القال والقيل

المرجله حصلتها مع هل الجود

نطاحة الواجب وذباحة الحيل

لغز لفانا حير الفكر بردود

من كف قرم صايغة للتعاليل

حبل المراجل دايم الدوم مشدود

ولايرتخي حبل تشده رجاجيل

واضح سؤالك يافهد منبع الجود

عندي ولا يحتاج شرح وتفاصيل

حبل المراجل مايجي دون مجهود

وقد قاله الشاعر حسين التماثيل

بديت باسم اللي له العالم اسجود

اللي نصر جنده وهزم هل الفيل

اللغز حله يافتى الجود موجود

المرجله مايدركونه مهازيل

المال له دورٍ لمن يبذل الجود

والى اجتمع هذا وهذا وفا الكيل

يامرحبا نصف التراحيب بالعود

والنصف الآخر في نظاف الفناجيل

يابو محمد ماعلى لغزكم زود

الطيب في صدور الرياجيل بالحيل

يامرحبا بك عد ماذعذع النود

وعداد ماتمطر علينا هماليل

وللغز حله حل واحد ومفرود

المرجله مابه جدال وتحاليل

يامرحبا ترحيبة تطلب الزود

بك يافهد من يوم جيت التماثيل

ولغزك لحبل المرجله صار مقصود

والله يوفقنا لدرب التساهيل

يامرحبا عداد مايخضر العود

واعداد ماهلت عليه الهماليل

واللغز حله واضح يافتى الجود

المرجله عنوان قرم الرجاجيل

ياهل الوفا والجود والهيل والعود

والمجلس اللي مدهلٍ للمشاكيل

اللي يعرف البيض يدري عن السود

حبل المراجل مابعد شافه بخيل

ياللي على درب الوفا تدفع الذود

حييت ماخن ازرق العود والهيل

يابو محمد لا انقص الهرج ولا ازود

حبل المراجل لبسوه الاكاليل

يامرحبا بك عدما هبت النود

واعداد برقٍ في مقادم مجاييل

اللغز حله يابن الاجواد ماجود

الطيب بفعول الرجال الحلاحيل

درب العطا ماله نهايات وحدود

لا لا,, ولا له في زمنا مكاييل

تكفون يارجال الوفا,, يا هل الجود

حبل المراجل لايجي به تباديل

عد السحاب,, وعد ماحنت رعود

حي الله اللي لابدا يوفي الكيل

للمرجلة حبل يابو حزاب مجرود

صحيح لامن مس ياصل ورا سهيل