عسعس الليل والبارق ضوى
سبح اللي يشوف البرق ضاوي
قلت يا من على العرش استوى
حي ابو متعب .. الحر النداوي
أشهد ان العرب ما هم سوى
والغلا .. ما يقسّم .. بالتساوي
والوطن كان حبي له هوى
أشهد اني هواوي.. ثم هواوي
من يقول الهوى ماله دُوا
عندنا له مشايخةٍ تداوي
في صحيح البخاري ما حوى
وعند مسلم على شرح النواوي
عن عمر بالسند عمن روى
يسنده ومتواتر ... كل راوي
مال كل امرء الا .. ما نوى
سنة المصطفى .. وحيٍ سماوي
ما تصابى الشعور وما غوى
سيدي وانت فريس الهقاوي
انت براق عز ... لا دوى
راعدك يصدع أسباب البلاوي
وان همل ما طرك كلٍ روى
كل حي... على لا ماك ياوي
سيدي خادمك تحت اللوى
بين أياديك وان طاح متساوي
جاء يبارك وطار به الهوى
وان توقع ترى ما هوب قاوي
والبطولة على اعلى مستوى
ماتجي بالسوالف والحكاوي
قلت طالع لها .. مالك لوى
ماتبي نشدة شيوخ.. وفتاوي
ما لها الا أحمر عبل الشوى
هذبته .. تبري جروح الشقاوي
فيه ثنتين من متعب سوى
فزة الحر.. واقدام الفداوي
ظامره كن باريه الطوى
فعل شيباني عند الحراوي
ساقت الخيل والخط استوى
وطالع بخير طيب ومتشاوىٍ
شاف بنت الهديه والتوى
قال: يا بنت انا ما نيب غاوي..؟
استوت له وجدّد ما انطوى
قرة عيون مقبول الدعاوي
وان نوى الداهية جذب القوى
السبق ... تصنعه زرقا الخطاوي
سلمت عقب ما لكوع انزوى
وجت مفيضة حسب ما كان ناوي
وجاك عفاس ما طال النوى
ما يبي له خوي.. ولا مخاوي
يا سلامي على اللي لا اهتوى
جاك كنه من اعلى طويق هاوي
والبطولات كاس ومحتوى
احسبوها وشوفوا .. كم تساوي؟
واقسموها على اربعةٍ سوى
العداله .. تقسَّم بالتساوي!
