اثر الطبيعة مالها وصف وامثال

لا صرت من جو البلد ضايق الجول

ابعد عن الضوضاء وروتين الاعمال

بأرض قفر ما طبها نجع ونزول

تنسى هموم داخل الصدر تجتال

جو الطبيعة يبعد الهم ويزول

في روض اخضر تو من ماطره سال

من عقب سيله ما وطى به ولا زول

بس ام سالم تزعج الصوت موال

تلعب طرب في حاجر الروض وتجول

اخير من قربة هل القيل والقال

اللي لهم طبع الردى هرج وفعول

بعض العرب بعدك عنه راحة البال

لو قال احبك كذب ما يصدق القول

ناس ضغاينها مثل صبغة الشال

سود ضمايرها من الحقد وامحول

وشوف الطبيعة رغبتي مابه اجدال

ومن لا مني بقول له ما نت مسؤول

مانته وكيل ادم على كل الازوال

والناس كل له مناهيج واميول