يا ويش رجل.. يودي العلم ويجيب

أصم أبكم كود بعض الاشارات

يا كل طعامه بانتظام وترتيب

ويوصل بعيد الدار في ظرف لحظات

تحكم ظروف الوقت ونصدونغيب

ونعود لتراث الجزيرة بساعات

«بالفاكس» نرسل للجزيرة مكاتيب

صداقةٍ دامت سنين طويلات

تحية مني لهندي وترحيب

لنا مع الألغاز صوله وجولات

أحدٍ يجيب الحل في قوله امصيب

لا قال ذاك الفاكس يرسل جوابات

يامرحبا والطيب في منقع الطيب

والطيب لأهل الطيب سلم وعادات

تنشد يابن نابت وتلقى من يجيب

بالفاكس نرسل لك حلول وإجابات

ما فيه حي يعلم السر والغيب

غير الذي عرشه تعلا السماوات

وكل البنادق تخطى الرمي وتصيب

و«الفكس» قام بواجبه بالغياثات

حييت يابن غياث بأحلى التراحيب

أرسلت لك بـ«الفكس» مني تحيات

الرجل «فكسٍ» دون شك ولا ريب

ذي رمعتي.. وأقول للناس رمعات

يا أهل الوفاوالمرجلة والمواجيب

ياللي تجيبون المعاني جزيلات

ثلثين سر المعرفة بالتجاريب

و«الفكس» له باللغز رمز وعلامات

يا مرحبا مني سلام وترحيب

مني لكم مقرونة بالتحيات

الفاكس ما غيره ترى يا هل الطيب

يا خذ ويعطي من علوم سريعات

يا مرحبا يا كاتب اللغز ترحيب

ولمحررين الصفحة ازكى تحيات

اللغز حله ما بها شك أوريب

الفاكس اله في بعض الأحيان فزعات

يا الشاعر اللي رتب اللغز ترتيب

لغزك حكمته دون زلة وغلطات

لغزك تراه الفاكس الغى المناديب

ياصل سريع وقايم بالمهمات

يا هندي أبرسل سلامي وترحيب

برسل سلامي لك ووافي التحيات

بالفاكس برسل لك بليا مناديب

لا من عطى «أوكي» تبين اشارات

أهلاً بهندي مع كثير التراحيب

الشاعر اللي صاغ لغزه بالأبيات

الحل : فاكس ما به شكٍ ولا ريب

اتقنت وصفه يا صبي الغياثات

هندي يا هندي جاك حلي بترتيب

يم الجزيرة يا عسى الوقت ما فات

هذا جهاز الفكس وبحلي امصيب

يقضي لزوم اللي بعيد المسافات

يا مرحبا يا مرحبا باللواعيب

عداد ما قالوا على اللغز رمعات

الحل واضح ما يبي اليوم تقريب

الفكس عجلٍ للحلول السريعات

أنا بحل اللغز عندي تجاريب

لا سهل الله لي تهون الصعيبات

الفاكس وقت اليوم مثل المناديب

إن كان ما جاء له مع الدرب عثرات

على أهل الأفلاج كسابة الطيب

من وادي الخرمة سلام وتحيات

واللغز حله يا رجال المواجيب

«الفاكس»وأوراقه ولا فيه شكات

يا مرحباً بهندي ملايين ترحيب

أقولها من جد ما هي مضاهات

اللغز بين يا حصان الأطاليب

لغزك تراه الفاكس ما به مراوات

هندي سلام الله عليكم بترحيب

من ساس قومٍ كاسبين الجمالات

وعبر الجزيرة نرسل الحل ونجيب

وبالفاكس أرسل لك سلام وتحيات

للصفحة الغراء تحية وترحيب

وللمرسل اللي ينتظر حل الاثبات

الفاكس حله يا كرام الأشانيب

في لحظةٍ ياصل بعيد المسافات

الله يعافي مكملين المواجيب

اللي لهم في ساحة العرف وقفات

الفاكس ما يلحقه شكه ولا ريب

يرسل لنا المرسال في كل الأوقات

بسم الذي يعلم عن السر والغيب

الخالق اللِّي نزل الحق بآيات

يا فكس أنت الحل ما ظِن به ريب

لا هنت وصِّل حلنا للغياثات