من حقي اصمت وانت من حقك البوح

حقي عتابك وانت حقك عنادي

يا صاحبي فيما تسويه مسموح

خذ راحتك ذا يعتبر شي عادي

لكن فسر كل الاسباب بوضوح

ومن بعدها كلٍ يحدر بوادي

من يوم شفتك تخلط الجد بمزوح

حلفت ما اخلي عليك اعتمادي

كنت احسب انك بالوفا جيت وتروح

واثرك تحاول كل يوم اضطهادي

وجهت لك نقدي معرّف ومشروح

والحمد لله بان فيك انتقادي

تنسى وتجرح بعد ما كنت مجروح

الكره عندك رمز والحب غادي

حاولت ترتيبك وانا كلّي طموح

تعبت لكن ما تحقق مرادي

حماسك المعهود ما منه مصلوح

الجمر مهما احمر يصبح رمادي

اللي بقى لك عندي احزان واجروح

واللي بقى لي عندك اغلى اجتهادي

العام..كنت اشوفك اغلى من الروح

واليوم اشوفك للاسف «شخص عادي»