رفرف علمنا يوم الاعلام رفت

علم بلدنا بالمحافل تجول

به جملة عن جملة الهرج كفت

واللي نطقها ينطق الركن الاول

راحت مظاهير الجهالة وقفّت

ركب الجهل مقفين والعلم حول

وقامت عيون الخلق فينا تلفت

اقلط هلا.. يا مرحبا.. فيك حييت

اربع معاني عادة للسعودي

الضيف يسمعها قبل يدخل البيت

ويعمه الترحيب حتى يعودي

اللي درس في مدرسة غبر الايام

تعطيه بقعاء في يمينه شهاده

شهادة ما ختموها بالاختام

ختم النكد فيها.. وختم السعاده

ينجح بها الفهمان عام باثر عام

يدرس ظروفه كلها بالركاده

مرت عليه احلام واسقام واوهام

وفقر شديد وغربة عن بلاده

ينقص على بعض الاوادم سعة بال

لاصار بالمجلس يجادل خصومه

يضيع مع درب الحماقة ويشتال

هم.. وزعل ويضيع الله يمومه

يا مبتدي بالهرج عن شي ما صار

جود علومك كلي شي مجود

وشن فايدة كثر السوالف والاخبار

تسمع كلام وبعد ساعه يزود

يزود من هرجة منافق وثرثار

ويركض بها اللي بالاشاعة تعود

كم واحد حطه على الجرح ويطيب

وكم واحد يزيد الجروح التهابي

وكم واحد صداقته لا فضى الجيب

ويصد عنك اليا امتلن المخابي

وكم واحد يبدي تحيه وترحيب

وسواد قلبه مثل ريش الغرابي

وكم واحد وقت السعة كنه الذيب

وان كان وصلت للحقيقة يهابي

المجلس اللي ما يقدرك راعيه

خلك عزيز النفس مالك وماله

لاصار ماحطت لجنبك مراكيه

تلقى من اخيار المجالس بداله

مغنيك ربك عن قهوته وشاهيه

دام المعزب ما يسرك قباله

نبي على مكه وهاذيك الاقطار

وتعود باذن الله سالم مسلم

ونبي المدينة حيثه للسعد دار

وعلى قبر سيد البريه نسلم

هذا السفر يعطي فوائد وتذكار

تاخذ دروس من الحياة وتعلم

ما هو سفر شله لها بالعبث كار

كل يوصي صاحبه.. لا تعلم

يعبث اليا سافر كما يعبث الفار

يظلم والى جاء في بلاده تظلم