مرحبا شرفتو الدار يالربع الحشام

شرف الله قدر ربعٍ يلبون الطلب

والله أنا الليل يحتاج وقفه واحترام

والتعارف للتوالف تراه أصل السبب

مرحبا في ربعنا هالزمان وكل عام

المعرفه ماشيٍ سلمها عند العرب

ليلنا هذا علينا مثل عيد الصيام

يالله أنك لا توفق نسع رجلٍ كذب

كل طيّب عزته مع رفيعين المقام

والذهب له قيمته مع صراريف الذهب

من ثمان وعشر والناس تحلف بالحرام

ما بقى إلا النار تقضي على جزل الحطب

يا حمد لك وقت مامن كلام ولا علام

وأنت رجالٍ تحل المشاكل والنشب

تالي الدنيا يروح الولد في ثوب خام

اتفكر واعتجب يا عجب كل العجب

جايزلي والمسالم يفتش للسلام

ماندور ليلةٍ تلحق الهاجس عتب

لو حصل لي بالمواقف مثل غيري وسام

صرت مثلك يا خطيبٍ تطول بالخطب

من بغى مكه من السوق يأخذ له حرام

ولا خبرنا حجةٍ حطه الله في رجب

الله.. الله فسرو يا مفسرت الحلام

للحقوق احلوق ما فيه شيٍ مغتصب

ما نغمس خبرة الصاج في ريح اليدام

والشريطي ياقف الصبح في وجه الجلب

المواري بينه والسفر يجلا الظلام

والرقاد الليل يجلا الكلوفه والتعب