الحبيب اللي اقبل من سما الغفران
مرحبا به عدد ما فاح ريحانه
مرحبا بالحبيب اللي غشا الوجدان
با عذب الوقت واحسانه وغفرانه
كنه الجوهره في واسط «الكردان»
كنه البدر زاهي بين جيرانه
أقبل أقبل كما ما يقبل كحيلان
كل عين على ملاقاه طربانه
يومٍ أقبل بحسنه قامت الفرسان
تشتري شوفته وتسج من شانه
مرحباً ضيف غالي يا شهر رمضان
يا كريمٍ ليا اقبل عزْ ضيفانه
أوله رحمة ينعم بها الانسان
واوسطه مغفره تطغي على احزانه
وآخره للتقي عتق من النيران
عز قلبي لمن هو فاته احسانه
فيه ليلة فردها الواحد المنان
عادلت بألف شهر بعفو مليانه
ليلة القدر نورٍ في سما الايمان
كل روحٍ للقيا النور عطشانه
الحديث الشريف اللي روى الشيخان
بين الفضل للصايم وثيبانه
يدخل الصايم الصادق من «الريان»
باب ما يدخله غيره.. علا شانه
والرجال اللي اصبح فعلهم برهان
كل منهم علا اسمه باخضر ايمانه
الصيام النهار وليلهم رهبان
والقلوب انتحت للخير عشقانه
جعل ربي يبلغنا شهر رمضان
قادرٍ يعفي الزلات سبحانه
الإله اللي انزل للملا القرآن
والصلا عالنبي ما فاح ريحانه
