أنشدك عن رجلٍ يساوي ملايين

ما أحد عرف شكله ولا اعرف وصوفه

يسكن مع الأفراد ومع السلاطين

دايم ورا الأبواب ما أحدٍ يشوفه

ما دام هومستور زينٍ على زين

والى انكشف للناس ما به حسوفه

يا راعي الألغاز ما هي تخامين

اللغز واضح والوصوف معروفة

السر وسط الصدر ما شيف بالعين

أخفى من المكتوب داخل زروفه

يابن بيان السر ما بين الاثنين

محفوظ بالصندوق ما احدٍ يشوفه

وإلى درى الثالث ترى الناس دارين

لا لا يغرك من يكثر حلوفه

النشده اللي وسمها بس حرفين

راع المعرفة لو سرح ما تطوفه

تطري على باله بعرف وبراهين

وتجمله لا من تلافت ضيوفه

وتنزله في موضعٍ بين قوسين

ليما غموض «السر» يكشف حروفه

لا جيت صالح بلغه بالمضامين

في حل لغزه ما علينا كلوفه

السر لا جاوز من الناس شخصين

يشيع ذكره والمخاطر تحوفه

أهلا عدد ما غنت الورق تلحين

اللي سمع صوته ومنهو يشوفه

لغزك يا بو تركي على الراس والعين

وقول حل اللغز ما به كلوفه

الحل سر ميزته بين الاثنين

وان انكشف للناس بانت احروفه

اللغز يا صالح تبين لنا زين

وأنا كتبت الحل واحسب حروفه

حيثك فهيم ومن رجال فهيمين

ومن لا حفظ سره قليل معروفه

يا مرحبا اعداد ما تبكي العين

واعداد حج البيت واللي يطوفه

السر حله والمعاني ملايين

ومن عادة العربان محد يشوفه

يا صالح التركي ترا الحل بيتين

سرٍ يشيله كل رجلٍ بجوفه

سر الرجال الطيبين الحشيمين

اللي كرمهم كل عينٍ تشوفه

ربع الجزيرة صفحة الشعر قارين

وأيضاً التراث ابكل جمعة نشوفه

وارجالها تختار من قولها الزين

الله يساعد من ايجمع احروفه

السر حل اللغز ما فيه تخمين

والعاقل اللي يحتفظ به ابجوفه

أهلاً هلا بك عد ما قالوا أهلين

واعداد رمش العين واللي تشوفه

السر محفوظٍ قديمٍ وذا الحين

عند الرجال وساجنينٍ حروفه

يا هل الصحون اللي تشيل البعارين

الطيبة عند الرجال مخلوفه

والطيب له عند النشاما براهين

وتميز الكذاب كثرة حلوفه

والسر له عندي مكانة وتثمين

لو العواذل يابن تركي تحوفه

دن القلم واكتب للاجواد بيتين

وخص الحميدي واللي يقرا حروفه

السر يبغى له رجال وفيين

دايم ورا الأبواب محد يشوفه

ما قال أبو تركي على الراس والعين

بأبياته اللي قالها ومعروفة

أنا اشهد ان السر ما بين الاثنين

واليا تفشى الناس تشهر سيوفه

واللي علينا نمسك السر ما يبين

قبل المشاكل والعنا والحسوفه

يا مرحباً بك عد نبت البساتين

في صفحة بالمجد دوم معروفة

واللغز يا صالح كتبته بتمكين

وأبدعت في معناه وأيضا حروفه

والحل «سر» لو تجاوز للاثنين

يشيع بين الناس ما أحد يطوفه

يا صالح اللي تكتب اللغز ويبين

الحل مثل الشمس كل يشوفه

والسر ما يبدا لناس ضعيفين

واللي حفظ سرك عليك معروفه

السر معروف يا صالح لشخصين

وإن زاد عن شخصين ضاع معروفه

جعلك عزيز ومن رجال عزيزين

ومن له عيون أكيد دربه يشوفه

اللغز حله واضح للفهيمين

وفي لغز صالح ما لقينا كلوفه

للسر لا تبدي ولا الناس دارين

وحفظان سر الآدمي وسط جوفه

صالح كتب لغز على العسر واللين

والحل يا صالح نسطر حروفه

جتك الحلول الوافية وسط بيتين

والسر لا تبديه لناس مخفوفة

على الرسايل يكتبون العناوين

من فوق والمضمون يبقى بجوفه

ما يحفظ الأسرار غير الشريفين

أمانة عند الرجال معروفة