للشعر ميدان واسباب ومواقيت وحراوي

وخيرة الحكمة وشر الهرج بهتان ونميمه

وللحكم راس الحكيم وللهوى قلب الهواوي

والنديم امرايه يعكس بها صورة نديمه

وكل دار قسمها من كل خير وشر حاوي

والسعد ماضي وحاضر دارنا والله يديمه

والعرب من طبعهم نبذ الدسايس والملاوي

والدسايس فوق اهاليها عواقبها وخيمه

والقلوب تشاهد اللي للنظر دونه غطاوي

ورمية ما تهلك المصيوب عبره واتعليمه

وموقف في عز ساعه مثل ما قال الخلاوي

خير من ذل الف عام في مهانات مقيمه

والوطن له نخوة في كل حماي لظاوي

والرجل من غير نخوه ويش فرقه عن حريمه

ياوطنا ما عليك خلاف من بعض الحكاوي

كل صاحب نعمة يحسد على واسع نعيمه

وكل شعب له زعيم يتبعه سارح وضاوي

والزعيم الفهد يوم ان كل شعب له زعيمه

نجتنب ما يجتنبه ونهتوي ما كان هاوي

ونهتدي بهداية الله ثم نظرته الفهيمه

والله انا ما نعرف الزور والغدر القفاوي

حربنا مع سلمنا نمشي دروب مستقيمه

ودون ذيك الراية اللي ما طواها كل طاوي

ما تحن المعتدين قلوبنا لو هي رحيمه

ياهل التوحيد محد ينصره كثر الشكاوي

لو يصب من الغضب فوق البشر سب وشتيمه

يوم تمت كل نعمه واكمل الدين السماوي

وانقطع وحي الرسل صارت مهمتكم عظيمه

والعدو لا برز نابه ما نشاطره الدعاوي

نشطره بالسيف الاوضح لين يقنع بالهزيمه

لين يرضى قسمته لو كان ما هي بالتساوي

ثم يترك ما ثقل حمله ويدبر مع خريمه

من تهقوى حربنا دارت عليه ام البلاوي

لا يحسب انا معازيب تعزمه للوليمه

برزت انياب اليهود ومن وراهم كل غاوي

في بلاد تعتبر تكبيره المسلم جريمه

والله اكبر من مخاليقه ويقوى كل قاوي

كافل حفظ الكتاب وحافظ له من يقيمه

واليهود محرف توراتهم سبعين راوي

وأغضبوا رب الخلايق وخذلوا موسى كليمه

ما تساوى دولة صار العدل فيها شلاوي

تبقر بطون الحبالى وتهتك عرض الحشيمه

وعقب ما غيب شموس ابوانهم ليل دجاوي

ما تشوف الا يتيم بايس والا يتيمه

ويش اعد من الجرايم والمخازي والمساوي

والطفل فيها يذكى مثل تذكاة البهيمه

دولة ضمت من حثالة بنادم كل ثاوي

زمرة ارهاب عليها ما بقى كبد سليمه

دولة ميزانها من كل خير وطيب خاوي

ما رجح كف الفساد الا بعد غيبة خصيمه

تكتسي ثوب النفاق وتسبله لين الحذاوي

ومع خساسة كل خبث لها علاقات حميمه

تكتسي ثوب النفاق وتسلبه لين الحذاوي

ومع خساسة كل خبث لها علاقات حميمه

للغدر فيها وجيه ما بهن وجه حياوي

والأمن فيها وجيه ايامه قباح دميمه

والرجا فيها بعد كان اجذم ما له مداوي

مات في عين الضعيف وعاش فيها ما يضميه

دولة اللي ما يبيعون العقيده بالرشاوي

عزوة ما يضربون المفسد الا في صميمه

مدة المحتاج واسعاف المكلح بالشفاوي

كنها فرض عليهم واجب ما هي بشيمه

ونصرة المظلوم وانقاذ الحقوق من التهاوي

كنها بدة فرصهم فرصة العمر العديمه

هم حماة الدين بالراي السديد وبالعزاوي

هم سلاطين العرب واهل السياسات الحكيمه

هم نعيم المملكه واللي لها بالخير ناوي

هم جحيم الضد ورجوم الشياطين الرجيمه

هم عيال اللي حذف روحه على داره فداوي

وانتشلها من شفا جرف عليه ابطت سقيمه

مجدهم فوق الثريا دونه الامجاد تاوي

كايد ميصاله ويصعب على صلب العزيمه

وجودهم يشمل عمومه للمقل وللغناوي

مثل ما يشمل شعاع الشمس الارض بدون غيمه

بينهم والجود خوة راغب وده يخاوي

وبينهم والشح هجران وعداوات قديمه

دارهم دار الرخا ما ضرها حسد الشقاوي

وامنهم عم البلاد وما يقر بأي قيمه

كم عدو دونها للحتف ساقته الخطاوي

جا يحسب انها نسيم وقابله ريح عقيمه

من طمع فيها وغرته المطامع والمناوي

راح من عقب الطمع يحسب خسايره الجسيمه

دولة اللي ما درو عن كل نباح يواوي

الملوك أهل الوفا واصحاب الايمان الكريمه

دولة آل سعود روس القوم وبعاد الهقاوي

من يساويها ودولة كل شرذمة ذميمه