العيد سنَّه ثابته في.. بلدنا
عيدا رمضان وعيد شهر الضحيه
عيدين لا ثالث لهم.. واعتمدنا
وبامر الولي نمشي وسنَّة نبيه
ما فيه عيدا لبنتنا أو ولدنا
أو عيد حب وعيد ناس وقضيه
والشرع نحكم به ومعه اجتهدنا
في كل سنّه جاتنا.. محمديه
ننهل من القرآن كامل امددنا
دستورنا الغالي من الله هديه
دستورنا اللي وضَّح اللي قصدنا
وبيَّن لنا درب السنع والخطيه
نمشي على ما فيه واللي نشدنا
نعطيه من كل الدلايل.. مزيه
وبقيادة الغالي ملكنا فهدنا
معه انتجدد والديانه.. قويه
ونعايده واخوانه اللي سندنا
لا كشرت سود الليال الرديه
ونعايد الشعب السعودي عمدنا
أهل العقول الراجحه.. والوفيه
لا من تكاتفنا على اللي ضهدنا
نوريه من فعل التكاتف منيه
في ظل من هم للقياده سعدنا
بعد الولي هم ظلنا.. والحميه
فهد وعبدالله معاهم.. صعدنا
حتى وصلنا رايةٍ شاذليه
وسلطان مع نايف تراهم عضدنا
في ساعةٍ بالضيق ماهي حليه
أشبال من هو بالشجاعة وردنا
صفو القراح وكل نعمه طريه
عبدالعزيز الحاكم اللي.. ضمدنا
عقب الجهل وأمراضنا الأوليه
والخاتمه أعيادنا في.. بلدنا
عيدا رمضان وعيد نحر الضحيه
