يا راكب من فوق حمرا ظهيري
تشدي النداوي طار من راس شاهوق
تشدي قطاة طيروها صديري
رفت بجنحان بثر جول وفروق
وتشدي تهنفل خفرة له عشيري
تقصر قدم تبي جواب من الشوق
ما فوقها غير الكلام الكثيري
على الجماعة حسب الامكان ولحوق
خص السلام على كبير وصغيري
حتى على لباسة الخصر والطوق
يا ناشد عنا ترانا بخيري
وأنا أحمد اللي بنبت العشب بفلوق
رب السما جبارعظم كسيري
يمشي سلم من عقب ما العظم مدقوق
اللي خلق زين اللبن من دريري
ما بين دم وفرث وعظام وعروق
نظرت في ملك ملكته كبيري
ما ابدله لو جيب لي ملك فاروق
ولو زودوا صنعا ووادي عسيري
ما أبيع ملك سقت به شمخ النوق
نبي نطيع اللي علينا يشيري
نبي نبدل دار بدار بلا عوق
نبي نسوي غرسة فوق بيري
بمجنب الصفرا نخلها تقل سوق
حب النخل لاجى لجا في ضميري
غلاه ركب بين قلب ومعلوق
لا صرت بالدنيا فطين بصيري
خمس النخل يسوي قطيع من النوق
الما قراح مثل صافي الغديري
يا ماحلا الفنجال بالشن والذوق
فنجال يشدا حيمران الذريري
بكر على صافي ولا هو بمحروق
متى نلم العيف وقت الحضيري
لما حلا حط المذانيب تريوق
