لا والله اللي حان تحريك الاجراس
وعيبك تكشف ياردي الهقاوي
لولا الحكم صرنا جدار بلا ساس
الله يعز الدين دين التساوي
حكامنا وجنودنا درع واقواس
والحكم حكم الله وثيق العراوي
حكم السعودية على العين والراس
ميزان عدل والمدبر سماوي
والشعب حراس وفي كل متراس
واللي نوا ناويه تسعين ناوي
جماعة التفجير للنار مقباس
هاذي شهاويهم وبئس الشهاوي
وش ذنب عذرى بين الاطفال تحتاس
من فعلكم يامزورين الفتاوي
جماعة التفجير في حكم الافلاس
ونبي نداويهم بحكم التداوي
ترى الطيب يداوي العين والراس
والسيف للمجرم طبيب مداوي
اللي قتل نفسه على غير مقياس
والله ما يسوى ولا هوب ساوي
جماعة التكفير من كل الاجناس
بانت نواياهم بكشف الغطاوي
يا للي تربيتا مع انذال وخساس
ذنبك على جنبك إلاصرت غاوي
تراك في نعمه وعزن ونوماس
وتاكل وترقد ياشبيه الضراوي
حافظ على دينك ترى بليس بلاس
وترى العدو يغوي ولا هوب ياوي
وان كان فيك من الشياطين وسواس
الناس ما تصبر على اهل الخطاوي
يا للي تغدر الناس في غفلة الناس
الله حسيبك مستجيب الدعاوي
القتل والتخريب من طبع الانجاس
اللي بصايرهم عليها غشاوي
وش ذنب ناس تالي الليل غطاس
عساك في وادن من النار هاوي
وادعي على اللي صاروا ارباع وخماس
ناس يجيبون الاقهر والبلاوي
ومن كان في قلبه من الجن وسواس
يحجر عليه ولا يخلى خلاوي
