حنا ولانا من كبار العمايم
متوارثينه من قديمات الأدوار
واللي يتيه وتبتليه الوهايم
له فوهة البندق وله سيف بتار
ولا نخاف اهل الفتن والنمايم
ومن لا يعمّر ما نسميه عمّار
واللي عن الطولات مبعد ونايم
ماهوب ندّ رموزنا ميت النار
مال العظام من الأمور العظايم
إلا الرجال اللي يدوسون الاخطار
من مثل أبو متعب للأمجاد رايم
للمجد كسابٍ وللخصم قهار
عنده لتوضيح الحقائق عزايم
رجل المهمة يعطي الشور ويشار
مهما تصعّب ما يعرف الهزايم
زبن الأمور اللي بها الفكر يحتار
طلق اليمين اللي يذب الخرايم
يهوم هومات كبيرات وعسار
حط العروبه هاجسه واللزايم
رجل السلام لمن بغى السلم وختار
وان كانها جت بالشدد والحزايم
صنديد قومٍ ما يحسّب للاشرار
زير الرجال ليا تلاقا الخصايم
ليث تبيّن هيبته يوم ينزار
صفّاق لطام البحور العوايم
خاض الامور اللي ورأ كل الابحار
شبحه يطول المبعدات الهوايم
ليثً يهقونّه طويلات الاشبار
غنام يكسب مجزلات الغنايم
حرٍ مخاليبه تقل وصف جزار
الله يفكه من شرور السهايم
ذخر الوطن عز العرب سر وجهار
"مدارات شعبية"