انكتب يا عين ذا حكم الاله
والقدر حل بأخويه واندفن
انكتب حكم الإله اللي عطاه
قلب أبيض من بياض أبيض كفن
انكتب حكمه ولا يبقى سواه
وآخر شموع الفرح عندي طفن
انكتب موته ودمعك وش جداه
مات وخدودي من دموعك حفن
آه آهٍ آه من فرقاه آه
آه عدعيون ودموع اذرفن
آه عد الليل لا اقبل في دجاه
وآه عد نجوم باناً ثم خفن
آه عد رعود وبروق بسماه
وآه عد جروح زادن ماشفن
يا سحايب نجد يا سحب وراه
يا سحاب في سما شامي غفن
يا سحاب اقصى الجنوب وما حواه
صوب قبره عانقي سحب لفن
خيّمي فوقه على ركز الحصاه
واسقي ارضه كان مزنك له وفن
خلّي أعشاب الربيع اليا كساه
من نقل وخزام وزهور ضفن
مع عبير الورد لافاح بذراه
وهب نسناس الهبوب وهفهفن
ينضرب فيه المثل من ما زهاه
من ربيع فوقه المزن اعكفن
انكتب حزني على طوال الحياه
وعمري افراحه مع الماضي افن
يا عسى قلبي اذا بلحظه نساه
فيه دقاته يقولون وقفن
ويا عسى ربِّ يابوخالد خذاه
يغفر ذنوبه بيوم به صفن
ويجمعه مع حور ما عنهن غناه
ويجعل الجنه لمن مثله سكن
"مدارات شعبية"