في ليلتاً فيها المعاني تجي طوع |
طلع علي الصبح مازلت واعي |
اكنسل المشروع واحط مشروع |
وأمشي وأراجع ما حل بنطباعي |
لا والله إلا الهم مثني ومربوع |
بين الضلوع العوج فل الشراعي |
مؤشر الضيقة على طول بطلوع |
ولا يقفل إلا نسبته بارتفاعي |
تقول كن الحزن في الصدر مزروع |
من طاري الضيقه وهم الوداعي |
يوم الربوع يتم لغيابك أسبوع |
يا سبة آلامي وسبة ضياعي |
يا للي غلاك بداخل القلب مطبوع |
لا تحسبن عمري على الصد ضاعي |
رح لا تودع واترك القلب موجوع |
وانا بودع لفهتي والتياعي |
دام الوصل ممنوع والصوت مقطوع |
ما للسهر والشوق والضيق داعي |
ما كل مخلوق ليا راح متبوع |
افجوج الأرض اليا افترقنا وساعي |
أول وقدرك فوق الامتنان مرفوع |
ولا طاح قدرك لين طاح القناعي |
أصعب عليك القلب من حبة الكوع |
ولا هوب حولك لو تفر الذراعي |
وان قلت لك جزل المعاني تجي طوع |
بقول كلمة وأحسن الاستماعي |
جوالي مقفل وملغي ومقطوع |
ولا نيب صوبك يا سبايب شياعي |
شافي بن عبدالهادي بن راجس |
|
