تعال يا ليل جب بنك وجب هيلك |
وانا بجيب القصيد وزهب دلالك |
تعال ابسهرك أسهر في مواويلك |
ما دام موالي ايشابه لموالك |
موال حزنٍ بدا يطرب ويشدي لك |
والحزن ما يشبه الا وقتك الحالك |
لا تشتكي ظلم من قطع مواصيلك |
انا معك حالفٍ ما اتركك بلحالك |
خلك خويي وانا بحييك واشيلك |
دامك معي حالف ما امّن بوصالك |
تعال يا ليل اسولف لك وابا احكي لك |
وانا بعد بسمع همومك وغربالك |
يا ليل ما جيت لك الا وبشكي لك |
ما جبت بك طيب الا جيت لك هالك |
وش حيلتك لو تعشق الشمس وش حيلك |
وهي نصيب الصباح بحكمة المالك |
والصبح ماله سوى انه صار يرثى لك |
هو فاز بالشمس لكن يرأف لحالك |
يا ليل يمكن تساهر ليلك وليلك |
والصبح ما همه نجومك مع هلالك |
هذي مشاعر خفوقٍ جا يغني لك |
موال حزنٍ ولكن حط في بالك! |
ابا اسهرك وانت جهز لي فناجيلك |
وابا شرب المرّ ما دامه من دلالك |
حق الذي جاك ضيفٍ لك وعاني لك |
واحذر تقصر بخوة من تعني لك |
عبدالعزيز بن صالح العوض -القصيم - الأسياح |
|
