مبداي باسم الله جل جلاله

سبحانه الفرد الصمد عالي الشأن

الحمد لله والشكر والثناء له

اللي خلق هالكون والإنس والجان

الشعر خيل في خفوقي خياله

ثم انهمر وبل تقفاه ودان

شاعر ومن شعري تفوح الأصاله

مانيب متسلف من فلان وفلان

وإن صار شعري في رموز الشكاله

يجيك بيته كنه السيف شامان

يا هاجسي عجل وهات الجزاله

عن العلوم الطيبه ما أنت عجزان

عن ما يكن الصدر عندي رساله

تعبير عما بخافقي لا أطيب إنسان

له الوفاء مني وكلي ولاء له

ومني سلامن له بمسك وريحان

هذاك أبو خالد ليا قال قاله

ترجح موازينه على كل ميزان

اللي على العالم صعيبٍ يناله

بالهمه اللي فالقساء شانها شأن

وإليا ارتكى للحمل يا عنك شاله

وعندي على ما أقول شاهد وبرهان

مهما ومهما قلت ما أوفي خصاله

تعجز بيوت الشعر في وصف سلطان

سلطان رمزٍ نستقي من خلاله

يا ما تعلمنا المكارم والإحسان

في غيبته هالشعب شي جراله

ما ظنتي يجري ولا ظنتني كان

شعبه منامه كم شهر ما هناله

حفين خدود الناس من دمع الأعيان

نفس الرجل وعياله وحرماله

فدوه لسلطان السعد طير حوران

كلٍ طلب ربه وكلٍ دعا له

يحفظ لنا بأمره سلايل كحيلان

وأسعد خبر وأسعد نبأ بالوكاله

هذا البيان اللي صدر عبر ديوان

قالوا ولي العهد بأعز حاله

وتباشروا بالعلم في كل الأوطان

والحمد لله يوم صارت سهاله

وعم الفرح بقلوب شيب وشبأن

عسى الولي يمدله في لياله

وعسى الولي يبعد عنه كل الأحزان

عضيد أبو متعب وحنا رجاله

لاجاء نهارٍ فيه داين وديان

رجالنا ما همه اللي إقباله

به تجتمع قوة عزيمه مع إيمان

هذا كلام اللي طمع بالجماله

والعذر كان القاف جاء فيه نقصان

وعلى رسول الله وصحبه وآله

صلاة ربي عد همال الأمزان

فارس بن عبدالمحسن الدلبحي

صفحة الجزيرة الرئيسية

الصفحة الرئيسية

رأي الجزيرة