ذق (يالمولع) وصفتي وانت تقراه |
وكلٍ على مشهاة نفسه يسيري |
الزين عندي فاتن الحسن معناه |
ومن الحيا غطى الحلا بالحريري |
يذرف دلال وخفة الدم يزهاه |
نور البدر الى ابتسم بالغديري |
مزموم ملهوف الحشى يقصر خطاه |
ثقلٍ على وسطٍ نحيلٍ كسيري |
زوله إلى منه صدف لك تشلباه |
فكرك .. ورجلك ثابته ما تسيري |
والعين تنظر فيه ولا تشوف من ماه |
وإن لد لك عينه حرفت النظيري |
والقلب يرجف لاقترب منك ممشاه |
وإلى ابتعد صفق خطيرٍ يطيري |
ينقش على كبدك رسمٍ لذكراه |
وينسج معاليق الحشى له جفيري |
واسع خيالك ينزوي في حلاياه |
ونار التمني بالضماير سعيري |
يصبح وصاله غاية النفس ومناه |
وقصر السواعد حسرةٍ للبصيري |
يا ويل من سلم خفوقه بيمناه |
ما له على (صكات بقعا) مجيري |
سالم السالم – بريدة |
|
