بسمك يا من بيدك تصاريف الأزمان |
يا عالم الأسرار ما بان والغيب |
أنت الرجاء وأنت الأمل عالي الشان |
وأن الذي للداعي الصادق مجيب |
يا اللي لمنك قلت للشي كن كان |
فرج همومٍ تحت عوجٍ محاديب |
من سبة أغياب أبيض الوجه سلطان |
شيخٍ غيابه صار للقلب تعذيب |
في غيبته غيم سمانا بالأحزان |
وعكر غيابه صافيات المشاريب |
الله يرده للوطن طير حوران |
سالم وغانم للشعب والمعازيب |
ادعي ويدعي له شباب وشيبان |
الله يطول عمر رجل المواجيب |
انا على شوفته هايم وشفقان |
أساهر النجمات وأقنب كما الذيب |
هذا مكانه شامخٍ وسط الأعيان |
وحبه سكن فالقلب بين المحاديب |
سلطان أبو خالد سند كل بلشان |
عوق الخصيم إلا عطيب المضاريب |
سلطان رمز الجود في كل الأحيان |
سلطان من خيره تجود المناصيب |
مدات أبو خالد يعمر بها أوطان |
وقفات أبو خالد تحقق مطاليب |
مدات جوده غيثها مزن هتان |
وتعشب بمداته سنينٍ مجاديب |
سلطان ويش أقول سلطان الإنسان |
فزعات أبو خالد تعالج مصاويب |
الاسم سلطان وبالأفعال سلطان |
رجل المكارم دون شكٍ ولا ريب |
رمز الشجاعة والتواضع والإحسان |
سلطان الأول لو بالأفعال ترتيب |
الله يرده سالم. رمز الأوطان |
الوافي اللي يكسب المدح بالطيب |
مهدي بن مسفر الحبابي |
|
