يا شادي الصوت هذا الليل يفجعني |
شكل بصوتك سماء ليلي ووجداني |
رجعني للحب والأحلام رجعني |
ذكرني باللي مضى من سالف أزماني |
أحتاج ساعة فرح وان قلت وش يعني؟ |
يعني كذا جيت أنا هارب من أحزاني |
تسعة عشر عام والأيام تدفعني |
لعالم ما اعرف الوافي من الجاني |
قلوب كثيره تبي حبي تبي طعني |
يا كثر ما تاخذ احبابي وتنساني |
اجوع من الحب والأحباب تشبعني |
اعطي ولا شوف من يعطي على شاني |
كلي تبعثر تعب من اللي بيجمعني |
يلم شملي قبل ما ارحل ولا القاني |
يزرع بقلبي أمل وان غبت يزرعني |
انسان مخلص معي في الحب متفاني |
الليله اشياء كثيرة صدق توجعني |
الحب والشعر وذنوبي وحرماني |
من وين ما رحت اشوف الشعر يتبعني |
ادمى جروحي وعند الناس عراني |
صحيح وافي معي والغير يخدعني |
اكتبه واقراه ويكتبني ويقراني |
الشعر طفل يداعبني ويسمعني |
مرات يضحك معي ومرات بكاني |
يا شادي الصوت قم بالله متعني |
رجعني للحب واحلامي وخلاني |
|
