يا الليالي كبر معروفك عليه |
كل سية منك من ضمن الهداوي |
والهديه منك تسوى أمية هدية |
ما تجي لي يا الليالي بالمناوي |
كنت سالي والنوايا شاذلية |
لين راسي منك ناشته المكاوي |
وانتبهت وقلت يا كبر الخطية |
الحقايق ما تغطيها الغطاوي |
والحلام أمست سراب ب(جرهديه) |
يا زمان الشين يا كثر البلاوي |
عقبها ميزت مالي وعليه |
وانقطع حبل الرجا دون الرجاوي |
والمسافة دون شفي سرمدية |
لو نهمت النفس وأبعدت الخطاوي |
لو عزومي من حديد وشقردية |
الظروف أكبر من عزوم الهقاوي |
والقدر محتوم والنية مطية |
والفتاوي عند مفتين الفتاوي |
والبروق اتلوح عرض العقربية |
والمطر ما طاح والوادي ستاوي |
والرديه ما تصافحها ايدية |
الردية عن مصافحها غناوي |
والزمان أشبه بحد النافعية |
من يقول: إن الزمن يرحم وياوي |
ثامر قطيم السبيعي |
|
