الموت دايم له ضحايا وغارات

يفجع قلوب الناس لاشن غاره

والحزن سكرة موت والقبر ميقات

ولا كل منهو مات موته خساره

لكن مثل غازي مصيبه ليا مات

إنهار برج (انسان) ما هو تجاره

مات الوزير.. اللّي عمر له وزارات

بنى خلاياها وزاره.. وزاره

وارسى قواعد صرح له شاهد اثبات

سماه اسم عملاق واصدر قراره

غازي بنى (سابك) منار الحضارات

جمع بها بين الذكى والمهاره

مات الوزير المحترم صادق الذات

اشهر مثال التضحيه والطهاره

ماهو من اهل المكر واهل الحيالات

اللي يعدون التحايل شطاره

نجمه لمع.. وابدع بعدة مجالات

شاعر واديب ومحترف بالاداره

بينه وبين منافسينه مسافات

يصعب على غيره يدور بمداره

بكى عليه اعلام واقلام واصوات

لأنه (وزير) بكل فخر وجداره

وحزن على فقده ملوك وسفارات

لانه وطن في قلبه اعظم سفاره

غازي علم يبقى على مر الاوقات

لو القبر يخفيه ويصير داره

فعلاً فقدنا (رمز) من ظمن الاموات

ولا لوم من يبكي عليه بحراره