كتب - عبد العزيز المتعب :
الحديث عن رموز الوطن كسيدي صاحب السمو الملكي الأمير سلمان بن عبد العزيز أمير منطقة الرياض أطال الله عمره وأدام عزه هو ما يميز الشعراء الجزلين في نصوصهم الآلقة كالشاعر ضيدان المريخي الذي سطر بالوفاء والولاء والإنصاف بعض مآثر أمير نجد الذي يرتقب الجميع عودته سالماً معافى بإذن الله:
ليلة مزون البشاير هل ماطرها
سحايبٍ برقها يكشف محياها
والناس هاضت من الفرحه مشاعرها
واللي بصدره حروف الشعر غناها
عيدية الشاعر اللي فاح مكسرها
يهب فيها النسيم من اين ماجاها
الدار قامت تزين في جواهرها
حتى انها تعطي الافراح معناها
شبوا لها العود الازرق في مباخرها
وشيلوا لها العرضه اللي من مزاياها
تعود فينا الليالي ونتذكرها
ونجدد امجادها من طيب ذكراها
افراحنا جعل ربي مايغيرها
لعلها دايمه والعز مبداها
العيد فرحه وبالفرحه نعبرها
في بهجة النفس نكتبها ونقراها
في روس الاشهاد نعلنها وننشرها
لين الوطن فرحة العيد يتهناها
افراحنا ياعسى المولى يكثرها
وبلادنا عامره ونعيش بحماها
والحمد لله ومن جوده علينا ارهى
مكارمٍ لو نعدد ماحسبناها
سر ياوطن في انجازاتك وطورها
لك حق وارضك لباس المجد يزهاها
مع كل فجرٍ جديد يجد منظرها
تلبس من اجمل ثياب العز واغلاها
والارض هذي تباهي في مفاخرها
تطول هامات اهلها قبل مبناها
ونفوسنا لاجل عز الدار نذخرها
تستاهل إنا بغال العمر نجزاها
بارواحنا حزة الواجب نخيرها
وارواحنا كلبوها من فداياها
ترقد وحنا الليال السود نسهرها
والله على الخير يحفظها ويرعاها
وحدودنا في عيون الامن نسبرها
تقصر جميع الهقاوي ماتهقواها
من لايصون الوطن عما يعكرها
مايستحق يتسمى في مسماها
ومن لا عرف قيمة النعمه وقدرها
باكر يدور لها ماعاد يلقاها
سر ياوطن للمعالي وانت خابرها
ماتنثني دونها يالين ترقاها
صوتك وصل للمعارف في منابرها
حتى ان شمسك كأن الليل مامساها
واهلك جملة حرارٍ من مواكرها
لا منه روحت تبعد معشاها
تهناك الافراح والعرضه وسامرها
وكل الاماني بعد ماطاب مسعاها
واغلى امانيك مايحتاج تذكرها
العوده اللي عسانا مانتباطاها
كلٍ سأل نجد هو وش فيه خاطرها
مع انها في ليال العيد ماحلاها
والله مانرضى عليها مايكدرها
لعل غر السحايب ماتعداها
كأنها سافرت تتبع مسافرها
كل الوطن بالمشاعر كنه اياها
افراحها تكتمل ويزين مظهرها
لامن سلمان حيت به وحياها
أغلى البشاير ليا شفنا بوادرها
لاقبل يلوح بكفه لاعدمناها
سلامة الطيب والنخوه وجوهرها
وسلامة اسمى معان الجود وانداها
وسلامة المجد واول نجد وآخرها
ومكارمٍ طيبها من طيب يمناها
سلمت ياراعي الوقفات واشهرها
اللي تخلد ولاحدٍ راح ينساها
طيارتك وجه الكبتن يطيرها
كل الوطن معك فيها ويتحراها
مصحوبةٍ بالسلامه من مغادرها
ياحيها من مغادرها لملفاها
يابو فهد والتهاني لك نكررها
على السلامه وعودتك نتمناها
نفسك من اول حياتك وانت ناذرها
في خدمة الدار واهل الدار ومناها
المستحيلات في همتك تقدرها
كل الطموحات تمشيها ليا اقصاها
هذي رياض السعد فكرك يعمرها
رقْيتها للسحاب.. وقام يرقاها
عسى السعاده بعد طلتك تغمرها
آمين.. والله لايفرقك انت وياها
ضيدان المريخي
