الجزيرة - الرياض:

الله يعوّض في زمانٍ مضى خير

وقت الأخوة والوفا والصداقة

يا بو يزيد أثر الزمن والبشر غير

ما عاد تربطني بوقتي علاقة

عجزت ألاقي للتغير تفاسير

مدري جهل يا خوك ولا حماقة

ومدري ألوم النفس ولا المقادير

واعتب على القاصين ولا الرفاقة

تعبت أدّور للخطايا معاذير

واحترت بين أسر الغلا وانعتاقه

ولو يجمع الناس الذهب والدنانير

بقلوبهم لو يكثر المال فاقة!

أرباحهم في كل حالة مخاسير

مثل السراب اللي يُغّر ابتراقه

ما للتجاهل بين الأصحاب تبرير

والعلقم: التهميش مرٍ مذاقه

وقلوب ما فيها محبة وتقدير

يا للأسف لو كان تنبض معاقه

والعمر يفنى لو تطول المشاوير

وبنفارق اللي ما انتمنى فراقه

يا بو يزيد اليوم كيف التدابير

ما عاد في نفسي على الصبر طاقه