كتب - عبدالعزيز المتعب
كل الشعراء الجزلين بمختلف أجيالهم تطرقوا بفخر لسيدي ولي العهد الأمير سلطان بن عبدالعزيز وسيدي الأمير سلمان بن عبدالعزيز أطال الله عمرهما وأدام عزهما لأن كل الجوانب في شخصيتهما محل لما يستحق أن يكتب فيه الشعر المتميز لهذا فإن الشعراء وثّقوا في قصائدهم الكثير والكثير عن سموهما، قال الأمير خالد بن سعود الكبير في الأمير سلطان بن عبدالعزيز ولي العهد حفظه الله:
يا مرحبا ترحيبة البدو بالنَّو
نوِّ مزونه ضاحكاتٍ بواكي
غرٍ ترزّم رحمةٍ ما بهن سو
غرقانةٍ بين الثرى والسماكي
جتهم عقب ما يبست الأرض وأبطوا
أروت عذيّ فياضهم والدكاكي
يا مرحبا باللي به الدار تزهو
ويزول عنهم حزنها والتشاكي
ترحيبةٍ من حرها كنها ضو
حكيتها بالشعر عذب التحاكي
من خاطرٍ مشتاق ماهوب يلهو
والقلب من طبعه بالأشواق حاكي
يا سيدي روس العرب لجلكم جو
وحولك غدا بين الرجال احتكاكي
تخاطفوا يمناك وارخو وحَبَّو
والكل رأسه للثريا يحاكي
حب وغلا والحب ماهوب من تو
كما صار حولك للقلوب اشتباكي
وش عذرهم لي صرت أكرم من النوَّه
والْيَن جناب من الحبيب المحاكي
وأصلب من الفولاذ لي كتم الجو
وأشفى من الترياق لي جاك شاكي
وقال الأمير خالد الفيصل في الأمير سلطان بن عبدالعزيز ولي العهد -حفظه الله-:
لا بأس يا من له على ما قسا باس
عدّاك يا سلطان ربي خطرها
تسلم وتبقى للشرف رافع الرأس
يا فرحة المضيوم ساعة كدرها
يدعون كل الناس من كل الأجناس
والله يقبل ما دعي لك باثرها
حبك غدا بقلوبهم ما له قياس
كم واحدٍ نفسه لنفسك نذرها
شوفك وذكرك للرجاجيل نوماس
اللي يدركون الأمور وخبرها
من حبّه الله سخّر لحبّه الناس
والله يخص بنعمته من شكرها
وقال الأمير الشاعر سعود بن عبدالله في سيدي الأمير سلطان ولي العهد:
سألت الأجفان وش خلّى القلم يسهر
والدمع حبري وحرفي وأصدق أوراقي
وفز الغلا شارقٍ بالنور لين أجهر
الشمس والضي والقمرا وبراقي
سلامتك كثر ما طلّ السفر وأدبر
سلامتك كثر ما في أيامنا باقي
حبيت كفك ودمعة خاطري تقطر
وضحكت وأفرحت مهمومٍ ومشتاقي
يا جعلي فداك يا عمّي وليت أقدر
وليت الدموع التي بالصدر لك تاقي
كل ما كبرنا محبتنا بعد تكبر
الدمع حوّل وحبك بالصدر راقي
جعل الذي ما يحبك سيدي يقهر
حبّك سحاب الصدور اللّي معه ساقي
حاكيت أنا الصبر عن عمي وقال إصبر
يشيل حملٍ ثقيل ولا بعد ضاقي
يا وجهك اللي مثل نور السّنا يظهر
يا بسمة اللي حزين ولا لقا لاقي
والله أحبك وربي بالقلوب أخبر
اللي يعافي ويقبل دعوة الهاقي
الدار تنشد عن اللي صفحته تنشر
بيضا مثل سحبها في وقت الاشراقي
تبقى لدارٍ بشوفك شوقها يمطر
طعمٍ مثل حبها بالروح ينذاقي
ماجور سالم معافى سيدي وأكثر
الطيب ثوبك وثوبك يالمرض ضاقي
كتبت سلطان في وجه الورق وازهر
عشب القصايد بقلبي وأجمل أوراقي
وقال الشاعر الكبير عمير بن زبن في الأمير سلطان ولي العهد:
الدار بأزكى العطر ذعذع هواها
وعم السرور قلوب وصدور أهلها
كل الجزيرة بحرها مع وطاها
وديانها.. وجبالها.. مع سهلها
بقدومكم سالم فرحها كساها
ولبست من الفرحة مفاخر إحللها
سكّانها بأزكى احترام تراها
ترفع لك الترحيب في محتفلها
مليون ترحيبة والأخرى وراها
بك يالزّعيم الشّهم طارد كسلها
سكانها من قلب ترفع ولاها
شبّانها.. وأطفالها.. مع كهلها
يابن الذي من يوم حل برباها
والخير من رب البريّة شملها
دارٍ لفاها العز.. ساعة لفاها
حرٍ إلى هام المراجل فعلها
واليوم الأمّة لك تردّد نداها
جانا الربيع.. وراح عنّا محلها
وقال الشاعر بطيحان بن منيخر في سيدي الأمير سلمان بن عبدالعزيز حفظه الله:
سلام يا أمير الرياض وفخرها
شخصٍ إذا ذكروا هل الجود مذكور
سلام يا نور البلاد وقمرها
لاغاب عنا بالسماء ساطع النور
شيخٍ مشاريعه تجي في شهرها
لا من ومر يسعى بها كل مأمور
أمره مطاع وهومته ما قهرها
لا خط له خطة مشت مشي بابور
نفسه على درب المعالي ومرها
ومن الوطا علا بها عالي القور
ومن السهل يجنح ويصعد وعرها
حيث الوعر عسرٍ على كل مبثور
ماليته للشعب ياما نثرها
للبادية واللي مقيمين بقصور
يمناه بالمعروف جانا خبرها
كم وقعت للشيك للبنك ممهور
ماله ذخيرة دون شعبه ذخرها
ياما قضى دين الذي جاه معسور
وان كبرت القاله وبيّن خطرها
هو ذخرنا الغالي إذا عسم الشور
يضرب عسيرات المحن في نحرها
منه الخطر يقضي على كل مخطور
نذرٍ يمينه لو تعسره بترها
في حال يا حلمه وفي حال ممرور
سيفٍ إذا صك الجماهي شطرها
صمصام حده كل ماناش مشطور
وقال الشاعر هلال المطيري في سيدي الأمير سلمان بن عبدالعزيز:
لا كشر الوقت وستل الزمان العنيد
سيفه ولونه علينا مثل لون الرماد
مسافته في زمان الخير ما هي بعيد
لا طول الماء في شرح الوكاد الوكاد
لا وكد العلم عن بيت الكريم الوحيد
اللي ليا زادت الشدة وكاده يراد
سلمان والجود واسم الجود ماهو جديد
مكارمه من فعل يمناه دايم جداد
له والله الشور لا ضاقت لرأيٍ سديد
له والله الفعل لا ضاقت بليل الهجاد
كم من حزينٍ رجع من عقب عطفه سعيد
وكم من غريب لقى في وسط صدره بلاد
هذا سليل الزعيم اللي بفعله فريد
اللي جمعها بحد المرهفات الحداد
وهذا سليل الزعيم اللي مماشيه عيد
في نصرة الدين معلنها الجهاد الجهاد
وهذا سليل الزعيم اللي فعوله تكيد
اللي جعلها عن أحزان الليالي أعياد
يا سيد الجود والمجد العظيم التليد
تباشر الجود بك ساعة لمست المهاد
ما زادك الجود شيء بذكر شخصك يزيد
بسمك ملاحم عن عيون الدهر ما تحاد
لو بادت الناس ذكر الطيبة ما يبيد
تبقى مع الوقت والتاريخ لازم يعاد
سلمان والجود واسم الجود ماهو جديد
مكارمه من فعل يمناه دايم جداد
