صدري على زلة الغالين متعوّد

ياكم دفن زلةٍ ما بين طيّاته

بالصبر والعفو والتقدير متزوّد

ولولا تغاضيه ما دامت علاقاته

كم واحدٍ قال لي عوده.. ولا عوّد

وانا ادري انه نسى ماهي بعاداته

وانا بهم لو يطول الوقت متجوّد

مادام قلبي تعاقب فيه نبضاته

مانمت عن ذكرهم لو اني انوّد

والدرب يجهدك لا طالت مسافاته

لاتشغل البال بالتفكير يا معوّد

اصبر عسى الوقت تضحك لك نهاياته

الناس تسمع وتحذف هرج وتزوّد

واللي يعاني هو ادرى في معاناته

وش جاب منهُ يقود لمنهُ يقوّد

وكلن حسب همته تنبت طموحاته

فعلٍ يبيض وجيه وفعلٍ يسوّد

ومن ينشد الطيب يزرع في بداياته