مشعان البراق شاعر محترف صاحب بصمة خاصة ومفردة متميزة يحملنا معه في مركب إبداعي خاص:

الله يرضالي عليك.. (الزعل ليه)!

كدرتني.. وانا متكّدر بلياّ

كلامك اللي قلت لي ويش اسميّه

في ذمتي ذمه ما احسبك كذيّا

ياكثر مالحقْت عليّ المشاريه

من يوم حطيتك بقلبي هنيّا

ان كاني مقصر بحقك وناسيه

قلي.. وانا في ماتبي ما اتريّا

ما اكذب عليك.. البعد ماني بقاويه

نهيت قلبي عن غرامك وعيّا

عيّا يطاوعني وعيّت اخليه

حتى ولو ان الوصل ماتهيّا

لو انك اقرب من قصيدي وطاريه

وابعد علي من الثرى للثريّا

ارجع قبل وجه الصباح وحراويه

وتعال في ظل الضلوع وتفيّا

غلاك مالي قدرةٍ يالغضي فيه

يمشي بدمي مثل ممشى الحميّا

آثر الغلا يثّر على حال راعيه

خصٍ ليا بانت علوم الجفيّا

اعلمّك عن ما بقلبي ومخفيه

ماعاد في دعوى المحبه كنيّا

قلي نبي ننسى المعاتب.. واقول ايه

وننسى الزعل كله.. ياسمح المحيّا