نص حمل بين قوة السبك والمعنى:

نركض ورى الدنيا وناخذ بالاسباب

ونشوف ويش الخاتمه بالنهايه

يمكن تجينا الفايده بعد الاتعاب

ونحقق المقصود في كل غايه

والا تروح بفالها مالها حساب

ولا أحدٍ ملك وقته بصك الولايه

وإن كان جار الحمل والوقت ما طاب

تجارب الأيام فيها الكفايه

مع دورة الأيام ياكثر الاصحاب

يصعب عددهم في صحيح الروايه

أحدٍ يجي وافي ولطيب كساب

حكيم راي ولا يبي له وصايه

واحدٍ لا جت له حاجته قفل الباب

نهايته ما هيب مثل البدايه

من يلحق المقفين شرهات وعتاب

منهم يصيبه كل شبهه وشايه

يا قل من يصفي وراس الولد شاب

من كثر ما يجري من أهل الوشايه

يلقى القلوب الصافيه بين الاحباب

لكن تهدم مثل هدم البنايه

عقب الرخاء كشر زمانه بالانياب

لو كان ما له في زمانه جنايه

شاف العجب والحق ماعنه مجناب

والا كلام الزيف ماله حمايه

قالوا رجال العرف واصحاب الا لباب

ما قامت حظوظ البشر بالدعايه

حبل الرجاء ممدود والظن ما خاب

والعاقل اللي دل درب الهدايه