الحظ شماعة على ما يقولون

للعاطلين الفاشلين المسبه

اللي عن انظار الرجال يتوارون

ما اغراهم الغربي عصير بمهبه

سماعة الغاوين تباعة الهون

لا احتجت ما تقدر حداهم تنبه

والحظ والنوماس والعز مرهون

باخذ السبب والمعرفة يالاحبة

والرزق مايحتاج للحي مضمون

يرجع مدى كثره وقله لربه

مافيه شي إلا بعد جهد وشطون

حاضر ماهو بكره وبعده وغبه

أما نبي زوجه وفلة وصالون

وحنا بعميان القلوب نتشبه

على المخدة تحت شرشف وفريون

نرقد ولا نصحى لصوت المنبه

هذا الذي لا يمكن يكون بالكون

ومن كان هذي هقوته رح وكبه

ما اقول له صاحي ولا اقول مجنون

أقول ناعه من ضياعه لعبه

ولا أقول له مطلق ولا أقول مسجون

يصبح ويمسي ما تعدى مربه

دونه جدار وباب درفة وكيلون

ومزلاج من حديد من غير ضبه

ليا دفعت من أثمن العمر عربون

وسعيت للدانة ورى كل غبه

ورجعت ماحصلت بعد التعب لون

هنا أعترف بالحظ لكن طبه

إقنع بمايقسم لك الرب من دون

لايبني الاحباط عليك قبه

للواحد الخلاق فيما خلق شون

والخير في ما اختاره الله وحبه

تذكر إن الحال مادام لعيون

اللي يمجد فيه واللي يسبه

الياس يامن تجهل الياس طاعون

يقتل طموح نفوسنا المشرهبه