مرثية بالوالدة رحمها الله التي وافاها الأجل المحتوم يوم الأربعاء 13-9-1433هـ، وتمّت الصلاة عليها ودفنها عصر يوم الخميس 14-9-1433هـ في مقبرة الشايع بمحافظة الرس .. رحمها الله رحمة واسعة وأسكنها فسيح جناته.

آمنت بالرحمن والِ المقادير

اللي بذكره تنكشف كل غمة

حزني كبير وفوق وصف التعابير

من وين ما لد النظر شاف همه

يا دار علي الضيق في حزة اعصير

والدمع ما تكون اجفوني تلمه

مفجوع بأمي منبع الطيب والخير

ويا حزن (عبدالله) على مفارق أمه

جوني يسوقون التعازي طوابير

وغيمة همومي بالصدر مدلهمة

بعد (أم محمد) ما للأيام تأثير

تمضي وقلبي بعدها وش يهمه

هذا ولدها بعدها كنه الطير

طاح وجناحه منكسر ما يلمه

فقدتها والحزن بافراقها غير

(أمي) غلاها وسط قلبي ودمه

بأيام شهر الصوم في موسم الخير

قبل العشر راحت قبل لا تتمه

وطالت على ادروب الهموم المشاوير

وهبت هبوب الضيق من كل يمه

ليل المفارق كدر الكون تكدير

وكلٍ تلعثم بوح صدره بفمه

يبكي عليها بيتنا صبح واعصير

وتسأل عليها الناس من كل يمه

اذكر ليالي بالعمر يوم أنا صغير

صغيرها اللي في حشاها تضمه

واليوم شايلها على النعش وأسير

واجمع ثرى قبر الحبيبة وأشمه

أمرٍ مقدر والقدر لازم يصير

مصيرنا اللي كلنا انروح يمه

هذي هي الدنيا كذا ما بها خير

يا شينها من بعد فرقاك (يمه)

واختامها دعوة لوالي المقادير

يجبر عزا قلبٍ سطا فيه همه

وينبت على قبر (أم محمد) نواوير

ويغفر لك ويرحمك ربي يا (يمه)

عبدالله بن عليان الصقر - الرس