يا ليلة الجمعة انتي ما فجعتيني

الا بقلبي سببك تشب نيراني

أخذتي الغالية والناس غافيني

أخذتي أوفى واعز واصدق انساني

حين اتصل بي أخوي وقال ذا الحيني

تعال انا بانتظارك عندي اخواني

جيت وبالاسعاف شفت المنظر الشيني

أمي تنازع واظن ان القدر داني

ناديت يمه وهي ما عاد توحيني

أقول يمه ومنها الصوت ماجاني

حاولت انا والأطباء والمسعفيني

ثم اسلمت روحها والأمر رباني

وحطيت كفي على أطهر حجاجيني

وودعتها بعبرة تهز وجداني

يا عين هلي دموعك لا توانيني

وخلي دموعك تسيل وتغسل احزاني

يا عين هلي دموعك لا تكفيني

وإذا قضى الدمع هلي دم شرياني

ما عاد به شي بعد أمي يبكيني

ما عاد به شي يسوى دمعة اجفاني

دنياي من بعدها هامش عناويني

ولا عاد به بعدها ما يلهب اشجاني

من بعدها أطوي همومي وتطويني

أقواها مرة وهي مرات تقواني

يا ليتني قبلها ميت من سنيني

حتى بعدها ما أعيش بلوعة ازماني

من بعدها اللي من الضيقة يسليني

أجي لها ضايق وأعود فرحاني

من بعدها اللي من الحسرة يداويني

من بعدها اللي بطيب الذات يرعاني

من بعدها اللي يخفف سطوة سنيني

من بعدها اللي من اللوعات يحماني

يا الله يا خالق الإنسان من طيني

تجعل جسدها النقي في بارد جناني

أدعيك خاشع لوجهك وارفع ايديني

واطلبك تجعل لها بالخلد رضواني

واجعل لها قبرها ورد وبساتيني

واجعل لحدها لنور منك ميداني

الموت حق وحنا فيه راضيني

كل من عليها كما قال الولي فاني

مات النبي والصحابة والسلاطيني

الكل للموت يبقى عالي الشاني

كتمت بالقلب حزني وذرفت عيني

واللي بقلبي طفح واستنطق لساني

وصلاة ربي عدد كل المصليني

على شفيع البشر من نسل عدناني

ابنك/ عطاالله بن سليمان العطاالله

- الزلفي