الشعر نارٍ تحترق به جوارحك

وتدفى محبينك على ضو نارك

بالموهبة ترسم بوادر ملامحك

حتى تحس بلوعتك وانصهارك

يحزنك بعض أحيان وأحيان يفرحك

وكانك ذكي فيه يتحدد مسارك

يتعبك لكن بالنهاية يريحك

يهجرك لكن تاجده بانتظارك

حكم ضميرك لين نفسك تصارحك

واضبط شعورك قبل تاخذ قرارك

كم فكرةٍ تسري معك لين تذبحك

ترغب مكاسبها وفيها دمارك

وان صف ريشك لا تكسر جوانحك

كن واقعي ولا يغرك طيارك

واكسب محبينك بكثرة تسامحك

واكرم ضيوفك واحفظ حقوق جارك

وامش برضا ربك تحقق مرابحك

وارسم على خط التوازن مسارك

وباهل المصالح لا تكبر مطامحك

وان طبلولك لا يزيد انبهارك

الناس بغيابك تذمك وتمدحك

وانت البخيص بسيرتك واعتبارك

وان قامت أفواه المباغيض تنبحك

خل التسامح والفضيله شعارك

واقبل مودن بالحقايق يصارحك

ومن موق عينك لا يتطاير شرارك

واحفظ يمينٍ بالموده تصافحك

ومدة يمينك خفها عن يسارك

واستر عيوب الناس تستر فضايحك

والعار عار الناس ماهوب عارك

واشكر عطا رب وهبلك ومانحك

وصلي على المختار واقرأ تبارك

الشاعر/ ضامن عبيد العنزي