شاعر الوطن خلف بن هذال مدرسة الشعر وسيد منابر شعر الوطن يأتي بنص كبير وخبير يكبته بلغته المتفردة الخاصة:
يابنت ياللي تطوي الثوب الأرداف
شط الحوار بدر بكرٍ يميحه
في مرتعٍ عشبة تغريف تغرياف
وأمه هجل ماشملوهـا منيحــه
والعنق عنق مذيرٍ عقب ما شاف
بوارديٍ لاقــفٍ لــــه بضـيحـه
والعين عين موحشٍ راس مشراف
يملا عيونه بالفجوج الفسيحه
يابنت مانرضى المهونه والاضعاف
لنا على روس المشاريف صيحه
لاتنشدين عن المنازل والاسلاف
يوم اذكر الماضي تهيج القريحه
فينا صفات الطيب يابنت واوصاف
ما تنطـبق في غــيرنا يامليحـــه
دخيلنا يرقد ورى الوجه ما خاف
يامن وتحماه السلوم الصــريحه
ناسم عصاه ولو يبي حج وان طاف
تحت الحمى ماواحدٍ يستبيحــه
وانفوسنا دايم عفيفات وانظاف
وابداننا من كل عله صحيحه
صاحين صافين المشاريب واشراف
ماناكــل المتـردية والنطــــيحه
وان ثارت الهيجا لنا وفد واطراف
وجه الحريب نقنعه بالفضيحه
وصلبين في وقت الشدايد وعراف
منا المشوره واخــتيار النصيحه
واكرام لو يلحق بنا نقص واخلاف
نملى الصحن ونلحفه بالذبيحه
يوم السنين الماضيه حيل واعجاف
ينقل لنا من هبة الريح ريحه
والعيشه اللي تدبل الكبد تنعاف
النفس عن ما تكره مستريحه
دنياً تموج ولا رسمنا لها اهداف
ياما تحتها من فعلون قبيحه
تجهز الغازي وتسرع بالانكاف
ولا تنكف الا بالفلس والقميحه
