فضفضت لي عن سواليف امها اللي كدرتها

والحزن مثل الحسن لامر لازم ينوقف له

جت تفلسف طفلةٍ مكياجها من فلسفتها

كملت عشرين عام ولاتزال اليوم طفلة

يشبع الخلخال والسلسال جايع برقبتها

خيزران لينها بين انتباه وبين غفلة

ودي ادري لامشت بشعور الارض اللي تحتها

وان تثنت قلت وين اللي يقول ان الترف له

آه لولا خصرها قلت اسرفوا في تغديتها

ما افقره بين النعيم ولايبي من ينتصف له

حاجةٍ تطري عليها جايبتها جايبتها

نسمةٍ ماتعترف بالباب والحارس وقفله

قلت وش ذا اللي خفق بين الضلوع امن اولتها

قبل اقول الضيف جاك اثره فتح كل الغرف له

يوم قدمته لها ليلة سرت بي سلهمتها

قالت اتشرف بقلبك يافتى قلت الشرف له

طرت مع سرب الحمام اللي سرى من حنجرتها

ساعتين وهي تسوق الرمش وابصم واعترف له

تجدل انفاسي والى حست دفاها كسرتها

واطلقتها للهبوب بكل طيشٍ تنجرف له

لين باخر طيشها قصيت اظافر شيطنتها

لاتشح بكيدها اللي كيدها ابن ادم ضعف له

نسنست عصرية الجمعة وهي تقرا بختها

بين جمع من العذارى كل شي منكشف له

كل ماجن يمشطن شرطانها اللي تعبتها

سمعوها من قصايد خلها اخر ما اتعرف له

ولدّت لحلمٍ تدورله وتنشد منظرتها

لدت لبروازٍ اسود دمعها ياماذرف له

لدت توصّي مكاتيبٍ قبل مازرفتها

ضمنتها الغالية دمعة وداع وعطر حفله

قلت اراضيها وجيت وجات والدنيا ملتها

والغزل دار ولقى المشتاق مشتاق يعزف له

كل مازودت وردي السواليف اخلجتها

وكل مازاد الحيا قلت الحلو وش ينكسف له

قالت امي تفتكرني طفلة وتظلم بختها

صح انا ماني بطفلة صح انا ماني بطفلة

- ناصر القحطاني