صدفه، وحوّلها الزمان لمواعيد

قصة علاقه فالمحبه، حميمه

جفت ينابيع الغلا،، والمواريد

ضاعت محبه في حياتي قديمه

في داخلي جرح، وبقايا تناهيد

غير الهموم اللي في قلبي مقيمه

مشتاق لأوقات الفرح والتغاريد

مليت أقاوم،، والمواجع أليمه

والمشكله،، عاداتنا، والتقاليد

تفرض علينا، مانطيق الهزيمه

أسترجع أحياناً مع النفس وأعيد

أيام كان الصدق، حاجه عظيمه

أيام كان الحب،، مافيه تنكيد

حتى نوايا الناس، كانت سليمه

أيام،،، ما فيها مخاوف وتعقيد

والكذب، ذاك الوقت أكبر جريمه

لاكن في وجه الوقت بانت تجاعيد

أسبابها، كثر الحسد والنميمه

غلطتك عند أهل الحسد كنها عيد

زلتك، كنز أهل النفوس اللئيمه

أحشّم أهل الطيب من دون تحديد

مير الردي ماله في قلبي حشيمه

غلطه تجي من صوب ناقص وعربيد

غلطة خبل من شخص كنه بهيمه

للطيب ناس،، وللطفاقه مقاريد

والعفو، طبع أهل العقول الحكيمه

ناس ٍ إذا ثارت،،، تثور البواريد

وناس ٍ تعيش العمر، من دون قيمه

لاصار ما للهرج،، رادع ولا قيد!!

صدك عن وجيه الآوادم غنيمه