انتظرتك لين مات الورد بيدي

وذبلت الأشواق في خافق تودّه

وارتشفت فوحدتي خيرة وزيدي

انعتاق النور من اصفاد ضدّه

لا تدوّر عن ملاذك في وريدي

أو عيوني أو حنينٍ تستمدّه

ولا تعذّر ما بقى ليلة ي سيدي

لك أولّعها واكون المستبدّة

عضّة الإبهام ما تذوب جليدي

من تربى فوق صدري وانت ندّه

نعمة النسيان لو غرّت جديدي

وانبثق عطري غواية لك أعدّه

ما هقيت امرايتي تنسى فعيدي

يوم وجهي هالكحل سايح بخدّه

ليت عهدي بالصبر ما كان قيدي

كان تنبت صرختي.. تزداد حدّه

هذي أشيائي تنبئ عن رصيدي

في ربيع العمر وحساب المودّة

واسأل السلسال عن حزنه فجيدي

من قهر لمعته واجبرها تهدّه

والقطار اللي رحل والورد بيدي

من يرجّع سكّته.. كيف استردّه