الناس تتشابه وتتفاوت بميزان الدهاء

والفهم عملة نادرة واسمع كلامي يا صبي

لا يتضح للناس إنك شخص قمة فالذكاء

واحذر تمثل صورة اللي دوم متخلف غبي

حاول مناخك ما يشابه جو خط الإستواء

الاعتدال أفضل طريقة شفتها في مذهبي

خل الصدر أوسع من الآفاق وأطراف الفضاء

واجعل شعارك: خلي الكورة تصير بملعبي

حاول تفرق بين مجموعة حرابي ومومياء

لا تضرب المسمار في صخرة إذا هو لولبي

هذا جبال الثلج تتشكل وهي فالأصل: ماء

وتذوب من بعد الشموخ وتنتشر في كوكبي

احذر تمر بمركبك مع عكس تيار الهواء

تجلس بعدها تشتكي يا مركبي يا مركبي

ولا تدعي إنك ذكي والبعض شلة أغبياء

ما قد ولد فينا إمام ولا رسول ولا نبي

واحذر تفكر إن كل الناس عندك أسوياء

ما يستوي شخص (ن) مثقف والذي يحبي حبي

الفرق واضح مثل بعد الأرض عن كبد السماء

والأصل يبقى حتى لو زاد الهجوم الأجنبي

هذي مجرد خاطرة أهديك من باب الوفاء

وإلا أنا ماني حكيم ولا ني الشخص الأبي

يمكن بعضكم يحسب إني شخص قمة في الذكاء

والبعض الآخر يحسب إني شخص متخلف غبي!!