أفهمك.. وش فيك شايفني غبيّة؟!

أو تشوف إني مثل بعض النساء عقلي شويّه؟!

لا تحاول تستفز أنوثتي..

ما ألين وإن لان الحشى لك أو خضع غصبٍ عليّه

ما ألين غير إن شفت (دمعك)

يركع ويسجد على شباك قلبي

أو على عسجد يديّه..!

أفهمك.. فنان يطربك الخجل

لا شفت فجره في الخدود المستحيّه

وأفهمك.. يالصايع المغترّْ بأمجاد الغزل..

يا أبو الغزل والنرجسيه!

وأفهمك عذب النبا على السجيّه

كن روحك.. مزنةٍ تسقي عروق المهمهيّه!!

مرتكي فوق السحاب

وبارد الأعصاب لكن.. فيك نار الجاذبيه

وش تبي.. كلمة أحبك؟؟

ما أحبك

بس أموت بكل صوت - تغرّده - صبح وعشيّه!

وش تبي.. كلمة عشقتك؟؟

ما عشقتك..

لكن إحساسك فِدَع بي وافترى بأحلى صبيّه!

أفهمك.. وأحتاج وقت أستانسك وأثقل عليك..

قبل ما تثْقل عليّ

أفهمك ماني غبيّه..!!

قلت أدري.. بس ما شا الله ذكيه!!