ماكل قولٍ تدرك الناس معناه

ولا كل من يكتب يجيد الكتابة

احدٍ عن الزلة يقدّيه مبداه

واحدٍ بلا مبدا يجرجر خرابه

أحد يزبّن بالوفا صاحبٍ جاه

لا عاف من ضيقة خفوقه ثيابه

يلقى الحجاج الطلق والعز والجاه

يطرد بها همٍ ثقيلٍ سطى به

ذا راس مالٍ لا اظلم الوقت تلقاه

يا بخت من هو ودّعه في حسابه

واحدٍ يتوه ولا لقى سكته تاه

كل الدروب اللي مشاها تشابه

ما يفرق أصحابه ولا يعرف أعداه

وما جا بحلقه من ردى القول جابه

مكسبك من مثله وشرواه فرقاه

خله يولّي بالوزا لا خرابه

شفنا سوادٍ دنّس الطهر وادماه

شفنا الغرابة تشتكي من غَرابه

راحوا رجال العز والباقي اشباه

اقفى زمان المرجلة يا سفا به

دام الشجاع يشوف وقته تحداه

واقفت علوم المرجلة والذرابة

ماكل قولٍ لا سمعناه طعناه

ولا كل غلطة للندم والكآبة

بعض الخطا ودك تموت وتفاداه

وبعض الخطا ودك تعيد ارتكابه