تلفت الأنظار

الهنوف اللي خذت قلبي معاها

سافرت قبل أمس من نجد العذيه

سافرت والقلب سافر من وراها

وتركتني جـالسٍ فـي المهمهيّـه

حبها كـل الأحـاسيس احتـواها

حب قيس وحب ليلى العامريه

والله إنِّي مخلصٍ وأتبع رضاها

لين خلّتني مثل كبش الضحيه

أترك الأصحاب وأمشي في هواها

وألعب إلها باللحون السامريَّه

درةٍ مصيونةٍ ربي عطاها

الجمال اليوسفي والجاذبيه

إن مشت تدرج وتقصر في خطاها

مشيت الورقاء على جال الركيّه

تلفت الأنظار وتزعّل اعداها

كنِّها بتقول كل الزين فيه

يا سعد يا خوي يا وجدي علاها

وجد من خلِّي بلا زاد ومطيه

في ديارٍ ما يبلّ الحلق ماها

تشوي الجربوع رمضاها القويّه

يالله إنك لا تخيّب من رجاها

ردَّها بعد السفر يا رب ليّه

الشاعر/ سهل بندر المقاطي - الدوادمي