انسكب عطرك وسال
جيت في بال القصيدة وانفتح باب الخيال
وهيجنتك الروح بالخافق على الطرق الثقيل
كيف تبلغك القصايد وانت وصفك مايطال
وان تغنيتك قصر عن وصفك البحر الطويل
انت من قدّك بلينك والتثنّي والدلال
وانت قدّك مطرقٍ من طاري النسمة يميل
لاذكرتك فاح وردك وانسكب عطرك وسال
وأمطرت غيمة حلاك بدفتري قبل استخيل
مرضيٍ عيني وعقلي.. ما على زينك جدال
وإن بغيت أرسمك في لوحة قصيدي تستحيل
من بعض مافيك تفتن فيك شيخات الجمال
وغير زولك بالمرايا مالك بحسنك مثيل
أحسب إن الليل مع شمس الضحى ماله وصال
وشفتهن بك بالشعر والوجه والرمش الظليل
في عيونك للقلوب العاشقة موت ووبال
امّا أنا من قبلها مع غيرها كنت القتيل
أحسب إن الظبي ما يقنص صناديد الرجال
لين أسرني صوتك الجذّاب والطرف الكحيل
لو عرفت إن الهنا باسرك ترجّيتك تعال
او نصيتك بس انا مالي على وصلك سبيل
للشهر بدره ومع زينك يجي بدره هلال
وانت زينك في مكانه لايغيب ولايميل
وانت حلمٍ بالتمنّي ماتجي.. صعب المنال
بس انا حقّقت بك حلمي ونلت المستحيل
وابتدا للشعر بعروقي توقّد واشتعال
وابتدا من فايض احساسي على الدفتر يسيل
وجيت في دنياي كاين حي من دنيا الخيال
وهيجنوك أهل الهوى بالسامري طرقٍ ثقيل
- الشاعر/ علي المفضي
